Vitnað í mömmu í Smuguviðtali

Ég hafði orð á því í viðtali við Smuguna að í skáldskap þætti mér eðlilegast að klæða skynsemina og vitið í mannheimum í búning gamallrar konu og hefði þá stundum óður mína að fyrirmynd.

Þóra Kristín orðar þetta svolítið öðru vísi en kannski bara betur og allt í einu móðir mín komin í fyrirsögn í Smuguviðtali sem ég er bara ánægur með. Þar er m.a. sagt er frá því að útrásarriddarinn Sigurður fótur er kominn í menningarlega útrás.

Myndin er frá laufabrauðsbakstri í eldhúsinu hjá mér um síðustu helgi þar sem sést í smáfólk Brekkugerðisættar og baksvip ættmæðranna mömmu og tengdamömmu.

Sigurði fót vel tekið

Sigurður fótur hefur hlotið afbragðsgóðar viðtökur gagnrýnenda og kaupenda. Komst einu sinni á metsölulista Eymundsson og enn er vika eftir! Að minnsta kosti þrír bókadómar hafa birst um bókina og hennar getið vinsamlega í framhjáhlaupi víðar. 

Helgi Bjarnason skrifar m.a. í dómi sínum:

Höfundurinn er fundvís á ýmis skondin atvik úr lífi venjulegs fólks sem flestir ættu að kannast við og jafnvel talið sína persónulegu upplifun. Þá er sagan hlaðin skemmtilegum lýsingum á atburðum og samskiptum fólks og tilsvörum.

Sjá nánar. 

Jón Daníelsson skrifar í Sunnlenska:

Svona grátlega – eða hlálega – vitlaus er íslenskur raunveruleiki. Í þessari nýju bók sinni setur Bjarni Harðarson grátlegan raunveruleika síðasta áratugar í búning fáránleikafarsa, sem stundum verður svo hlálegur, að lesandinn gæti haldið að hann væri staddur í miðri bók eftir þann ágæta meistara skopsögunnar P. G. Wodehouse.

Sjá nánar.

Loks skrifar Jón Þ. Þór ágætan dóm þó hann hafi verið svoldið spar á stjörnur sem er eiginlega svoldið sætt, allavega fallegra en þegar ritdómar standa varla undir þeim stjörnum sem á þeim hvíla. Jón Þ. segir m.a.:

Frásagnarmáti höfundar er lipur og myndrænn, á köflum bráðfyndinn og margar persónulýsingar einkar skemmtilegar. Þó er þetta engin skemmtisaga, miklu frekar hárbeitt háðsádeila á íslenskt samfélag undanfarna tvo áratugi eða svo. 

Sjá nánar

Vestfirskt upplestrarkvöld með meiru

Árviss úgáfuhátíð Vestfirska forlagsins sunnanlands  verður í Sunnlenska bókakaffinu á Selfossi fimmtudaginn 16. desember og hefst kl. 20:00. 

Þar verður lesið úr nokkrum af hinum fjöbreyttu útgáfubókum Vestfirska forlagsins fyrir þessi jól.  Hafliði Magnússon les úr 3ja bindi nýr bókaflokks Frá Bjargtöngum að Djúpi, Jóhann Diego Arnórsson les úr bók sinni Undir miðnætursól, sem fjallar um amerísku lúðuveiðimennina við Vestfirði á tímabilinu 1884-1897.  Finnbogi Hermannsson les úr bók sinni, Vestfirskar konur í blíðu og stríðu. Jón Hjartarson á Selfossi les úr bók sinni Fyrir miðjum firði. Myndbrot frá liðinni öld. Emil Hjörvar Petersen kynnir einstaka ævintýrabók sína, Sögu eftirlifenda en höfundur á ættir að rekja á Ísafjörð. Loks les Sveinn Runólfsson í Gunnarsholti úr bók sinni um refaskyttuna hugljúfu. (Þórunn Erlu-Valdimarsdóttitr sem ætlaði að vera með okkur forfallast.)

Lýður Árnason nýkjörinn þingmaður á Stjórnlagaþingi sér um tónlistarflutning ásamt félögum sínum og Ólafur Sæmundsson frá Patreksfirði flytur gamanmál.  Allir eru velkomnir.

Af því að Ísland er fullvalda en Írland ekki!

... Ísland setti neyðarlög sem skákuðu eitruðum lánum erlendra risabanka til hliðar, einmitt og nákvæmlega í ljósi neyðarréttar fullvalda ríkis til að gæta hagsmuna sinna. Á Írlandi var tekið allt öðruvísi á málum, vegna aðildar landsins að ESB. Ráðamenn voru ekki sjálfráðir gerða sinna og segir það sitt um áhrif aðildar á fullveldi ríkja.

(Ragnar Önundarson: Stjórnmálaskólinn við Austurvöll, Mbl. 11. desember 2010)

Magnað upplestrarkvöld í bókakaffinu

Bragi Ólafsson, Unnur Karlsdóttir, Ingibjörg Elsa Björnsdóttir og Jón M. Ívarsson og lesa úr verkum sínum í Sunnlenska bókakaffinu í kvöld.

Bragi er höfundur skáldsögu sem hlotið hefur tilnefningu til bókmenntaverðlauna og heitir: Handritið að kvikmynd Arnar Featherby og Jóns Magnússonar um uppnámið á veitingahúsinu eftir Jenný Alexson. Unnur Birna Karlsdóttir sagnfræðingur er höfundur bókarinnar Þar sem fossarnir falla. Í henni er gerð grein fyrir sögu virkjana og nýtingar fallvatna síðastliðin 100 ár. Ingibjörg Elsa Björnsdóttir þýðir Dæmisögur Tolstojs og Jón M. Ívarsson sagnfræðingur er höfundur bókarinnar HSK í 100 ár sem er stórvirki í héraðssögu Suðurlands.

Upplestur á hefst klukkan 20, ókeypis aðgangur og allir velkomnir meðan húsrúm leyfir.

Bensín á kókflöskum og einkasala á bókum

Þegar ég ók á vespu inn í Sahara fyrir nokkrum árum komst ég langt út fyrir þau svæði að olíufélögin ættu þar sína glæsiskála með rafknúnum dælum en það var alltaf hægt að fá bensín. Við litla kantaða leirkumbalda hlupu berfættir krakkalingar út úr húsasundum með bensín í litlum gler-kókflöskum sem selt var á prúttverði. Og áfram skröltum við vespan inn í sandana.

Það vill til að ég sel kók í gleri hér í bókakaffinu og núna þegar bensínstöðvar landsins eru farnar að selja bækur þá veit ég ekki nema okkur  bóksölum þessa lands beri skylda til að bjóða upp á bensín. Nóg er hér af glerinu. Ég gæti geymt flöskurnar bensínfullar í óræktargarðinum bakvið og vantar eiginlega ekkert nema krakkana til að hlaupa með þessa krúttlegu mólotovkokteila.

En það er margt í þessum heimi krúttlegt á okkar síðustu og verstu tímum. Eins og bara það að sjá fyrrverandi viðskiptaráðherra sem átti sér hugsjónir um betri viðskiptahætti koma snemmbúinni ævisögu sinni fyrir í einkasölu hjá mesta einokunarfyrirtæki þessa lands og það með þeim sértæku kjörum að bókinni má ekki skila. 

Þetta verður alveg eins með  bensínið hjá mér, það fær enginn að skila því sem keypt hefir...

Englajól eftir Elínu frumflutt í dag

Ballett við söguna Englajól verður frumfluttur í Salnum í Kópavogi nú klukkan eitt í dag. Höfundur tónlistar er Elín Gunnlaugsdóttir. Hægt er að kaupa miða hér, http://salurinn.is. Höfundur sögunnar er Guðrún Helgadóttir rithöfundur en húnv ar endurútgefin hjá Forlaginu fyrir skemmstu.

Flytjendur tónlistarinnar eru Pamela De Sensi, flauta, Frank Aarnink, slagverk, Katie Buckley, harpa og Ólöf Sigursveinsdóttir, selló en þau tilheyra öll Sheherazade- hópnum og dansarar eru nemendur í Listdansskóla Íslands. Sérstakur gestur á tónleikunum er Kársneskórinn undir stjórn Þórunnar Björnsdóttur.

Þeir sem vilja fá andlitsmálun fyrirsýninguna geta mætt í Salinn klukkan 12:30 en Elín vill að ég sleppi því. Svo í staðin bangaði ég saman bindishnút í tilefni dagsins og kominn í perúínsku jakkafötin sem eru annars helst ekki notuð nema á jólunum ...

(Myndin er frá æfingu í gær.)

Sigurður fótur á metsölulista

Sigurðar saga fóts er á metsölulista Eymundsson yfir skáldverk, þar í 13. sæti sem er mikið happanúmer.

Fjöldi skáldverka er meiri nú en verið hefur undanfarin ár og því telst mikill árangur að ná inn á nefndan lista. Eins og eðlilegt hlýtur að teljast verma sakamálasögur flest efstu sætin, fjögur af sjö og þar eru Arnaldur og Yrsa eðlilega á toppnum. Næst þeim koma svo tvær bækur sem báðar hafa fengið lofsamlega dóma, m.a. hér á bloggi undirritaðs, Ljósa eftir Kristínu Steins og Svar við bréfi Helgu eftir Bergsvein Birgisson.

 

Listinn er annars svohljóðandi og nær til bæði skáldsagna og ljóða í sölu Eymundssonverslana síðustu viku nóvember.

1. Furðustrandir /  Arnaldur Indriðason

2. Ég man þig /  Yrsa Sigurðardóttir

3. Ljósa /  Kristín Steinsdóttir

4. Svar við bréfi Helgu /   Bergsveinn Birgisson

5. Hreinsun /  Sofi Oksanen

6. Morgunengill /  Árni Þórarinsson

7. Önnur líf /  Ævar Örn Jósepsson

8. Mér er skemmt /  Einar Kárason

9. Drottning rís upp frá dauðum /  Ragnar Arnalds

10. Heimanfylgja /  Steinunn Jóhannesdóttir

11. Landnemarnir /  Vilhelm Moberg

12. Bréf til næturinnar /  Kristín Jónsdóttir

13. Sigurðar saga fóts /  Bjarni Harðarson

14. Frumskógarbókin /  Rudyard Kipling

15. Myrkvun /  Stephenie Meyer

Metsölubækur á bókakynningu í kvöld

Guðni Th. Jóhannesson og Ragnar Arndalds lesa úr verkum sínum í Bókakaffinu í kvöld  og þá mun Elín Gunnlaugsdóttir bóksali kynna nýútkomnar ljóðabækur.

Guðni Th. Jóhannesson er höfundur að ævisögu Gunnars Thoroddsen sem var einn af áhrifamestu stjórnmálamönnum landsins á liðinni öld. Ragnar Arnalds sendir nú frá sér sögulega skáldsögu um Margréti Skotadrottningu sem kemur mjög við Norska og um leið íslenska sögu á 13. öld. Bók Ragnars heitir Drottning rís frá dauðum.

Húsið opnar klukkan 20, ókeypis aðgangur og allir velkomnir meðan húsrúm leyfir. 

Þess má geta að bók Guðna Th um Gunnar er metsölubók meðal ævisagna og sömuleiðis hefur bók Ragnars komist á metsölulista skáldrita.

 

Að lokum er rifist um ekkert...

... Hér austanfjalls er algengt að menn trúi á Njálu líkt og í öðrum jarðarplássum er trúað á Testamentin eða Kóraninn. Í trúarriti þessu, sem er mikil kennslubók í pólitík, er flærðin yfirleitt skammt undan. Og einnig þar lyktar öllum deilum með því að rifist er af mestri heift um ekkert. Þannig er Gunnar á Hlíðarenda að lokum drepinn fyrir litlar og óljósar sakir og deilur Flosa og Njálssona rekur í strand út af ómerkilegri tusku í sáttagulli eftir Höskuld hvítanesgoða. Þegar Flosi efast um að Skarphéðinn sé maður orða sinna er fjandinn laus.

Líkt þessu var andrúmsloftið á nýlegum flokksráðsfundi VG þar sem að lokum var tekist á um tvær tillögur sem báðar virðast við skoðun merkja það sama þó að þær séu kannski misgreinilegar.

Sjá nánar í grein minni á Smugunni.